చిలకలూరిపేట పట్టణంలోని ప్రముఖ విద్యాసంస్థ ఆక్స్‌ఫర్డ్ ఐఐటీ స్కూల్‌లో 10వ తరగతి విద్యార్థినుల కోసం నేరాలు, సైబర్ సెక్యూరిటీ మరియు బాలికల భద్రతపై ప్రత్యేక అవగాహన సదస్సు నిర్వహించారు. ఈ కార్యక్రమానికి ముఖ్య అతిథిగా హాజరైన చిలకలూరిపేట టౌన్ సీఐ పి. రమేష్ మాట్లాడుతూ… ప్రస్తుత డిజిటల్ యుగంలో సోషల్ మీడియా వినియోగంపై ప్రతి ఒక్కరూ అప్రమత్తంగా ఉండాలని, వ్యక్తిగత వివరాలు, ఫొటోలు, పాస్‌వర్డ్‌లు, ఓటీపీలు ఎవరితోనూ పంచుకోవద్దని సూచించారు. బాలికల రక్షణ కోసం ఉన్న పోక్సో చట్టం, చట్టపరమైన హక్కులు, అత్యవసర సమయాల్లో పోలీసుల సహకారం పొందే విధానాలను ఆయన వివరించారు. ఎవరైనా వేధింపులకు గురిచేస్తే భయపడకుండా తల్లిదండ్రులు, ఉపాధ్యాయులు లేదా పోలీసులకు తెలపాలని స్పష్టం చేశారు. అనంతరం బాలికల భద్రత కోసం నిరంతరం కృషి చేస్తున్న సీఐ రమేష్‌ను పాఠశాల యాజమాన్యం, విద్యార్థినులు ఘనంగా సన్మానించారు. ఈ కార్యక్రమంలో స్కూల్ డైరెక్టర్లు మహమ్మద్ అస్లామ్, షాహీన, ఉపాధ్యాయ బృందం మరియు పెద్ద సంఖ్యలో విద్యార్థినులు పాల్గొన్నారు.
